GLESVÆR: – Eg greier ikkje heilt å sjå på meg sjølv som kunstnar. Eg har drive med måleri i vel eitt år og har ingen formell utdanning i dette faget, seier Katrine Risløw.

Laurdag opna ho ny utstilling på Glesvær kafe. Sosionomen og tobarnsmora frå Øygarden satsar ikkje på at måleria skal bli meir enn ein hobby. Men det betyr ikkje at ho ikkje tek arbeidet seriøst.

150 måleri på eitt år
Sidan ho starta å måla har ho selt over 150 måleri, og dei siste ti månadane har det teke av. Det går mange helger og kveldar med til arbeidet.

– Eg har hatt utstillingar før, men sel også mange måleri på bestilling frå folk som har sett arbeida mine. Ofte reiser eg heim til dei og lagar eit måleri som passar i fargar og storleik til stova det skal henga i, seier Katrine Risløw.

Ho har ingen problem med å tilpassa måleria til kjøparen si stove, heller enn at kunden må tilpassa stova si til måleria hennar. Slik sett er dette kanskje like mykje handverk som kunst?

– Det er nok det ein kan kalla interiørkunst. Fargane er det viktigaste og måleria er abstrakte. Dei får ingen tittel, eg likar å la folk sjå kva dei vil i måleria, seier Risløw.

Starta med eiga stove
Det heile starta med at ho lagde måleri til si eiga stove heime i Øygarden. Då jentene i dameklubben fekk sjå arbeida ville dei kjøpa alt ho hadde på veggen.

– Eg fann ikkje måleria eg var ute etter i galleri eller på utstillingar. Fotografi har eg drive med i mange år, så eg lærte meg sjølv å måla. I januar fekk eg bestilling på seks måleri til eit firma som driv med interiørdesign i Oslo, fortel Katrine Risløw.

Det var då det tok av. Måleria vart brukt av eigedomsmeglarar som hengde dei opp på visningar kring i Oslo. Sidan har Risløw fått ei rekkje bestillingar på måleri, og starta eige firma med det fantasirike namnet «Ballongfisk».

Sel mest til unge
Ho brukar vassbasert måling på lerret, og målgruppa er yngre mennesker.

– Dette er folk som gjerne ikkje har det same ønskjet om måleri av ein båt på ein fjord som kanskje eldre kjøparar har. Dei er opne for abstrakte måleri, men prislappen må vera tilpassa deira lommebok, seier Risløw.

Ho er glad for å få stilla ut på Glesvær Kafe, og tykkjer alt har gått veldig fort kring «kunstnarkarriera».